Gjyqtarët e Luizianës mund të urdhërojnë tredhjen kirurgjikale për njerëzit e dënuar për krime seksuale ndaj fëmijëve të vegjël sipas legjislacionit të miratuar të hënën – dhe nëse guvernatori republikan, Jeff Landry , e nënshkruan atë në ligj, shteti me sa duket do të ishte i pari në ShBA me një dënim të tillë.
Legjislatura shtetërore e kontrolluar nga republikanët miratoi projektligjin duke u dhënë gjyqtarëve mundësinë për të dënuar dikë me tredhje kirurgjikale pasi personi të jetë dënuar për disa krime seksuale – përfshirë përdhunimin, inçestin dhe ngacmimin – ndaj fëmijeve nën 13 vjeç.
Një numër i madh i shteteve, përfshirë Kalifornia, Florida dhe Teksasi kanë ligje të cilat lejojnë kastrimin kimik. Në disa prej këtyre shteteve, të dënuarit mund të kërkojnë vetë t’i nënshtrohen këtij trajtimi nëse duan. Por deri tani nuk ka shtete në të cilat gjykatësve u lihet në dorë të vendosin në lidhje me këtë.
Për më shumë se 16 vjet, gjyqtarët në Luiziana janë lejuar t’i sanksionojnë të dënuarit për krime të tilla me tredhje kimike, megjithëse ky dënim jepet rrallë. Kastrimi kimik përdor medikamente që bllokojnë prodhimin e testosteronit për të ulur dëshirën seksuale. Kastrimi kirurgjik është një procedurë shumë më invazive.
“Kjo është një pasojë,” tha senatori republikan i shtetit Valarie Hodges gjatë një seance dëgjimore të komisionit mbi projektligjin në prill. “Është një hap përpara dhe përtej thjesht të shkosh në burg dhe të dalësh.”
Projektligji mori miratim dërrmues në të dy dhomat e legjislaturës shtetërore të dominuara nga republikanët. Votat kundër projektligjit erdhën kryesisht nga demokratët. Megjithatë, një ligjvënës demokrat – senatorja shtetërore Regina Barrow – ishte autore e legjislacionit.
Aktualisht, janë 2224 persona të burgosur në Luiziana për krime seksuale ndaj fëmijëve më të vegjël se 13 vjeç. Nëse projektligji bëhet ligj, ai mund të zbatohet vetëm për ata që e kanë kryer këtë krim në ose pas 1 gushtit të këtij viti.
“Ne po flasim për foshnjat që po dhunohen nga dikush,” tha Barrow gjatë një takimi të komitetit në prill. “Kjo është e pafalshme.”
Ndërsa tredhja shpesh lidhet me burrat, Barrow tha se ligji mund të zbatohet për gratë. Ajo gjithashtu theksoi se shqiptimi i dënimit do të jetë rast pas rasti dhe në diskrecionin e gjyqtarëve.
Nëse një shkelës “nuk paraqitet ose refuzon t’i nënshtrohet” tredhjes kirurgjikale pasi një gjykatës urdhëron procedurën, ai mund të goditet me një akuzë “mospërmbushjeje” dhe të përballet me tre deri në pesë vjet burg shtesë, bazuar në këtë projektligj.
Ligji aktual i kastrimit kimik të Luizianës ka qenë në fuqi që nga viti 2008, por zyrtarët thanë se nga viti 2010 deri në vitin 2019, ata mund të gjenin vetëm një ose dy raste kur ishte përdorur.
Konteksti i Maqedonisë së Veriut
Maqedonia e Veriut nuk ka lejuar asnjëherë tredhjen kirurgjikale të personave të dënuar për sulme seksuale ndaj fëmijëve. Megjithatë, nga viti 2014 deri në vitin 2023, ligjet pozitive të vendit kanë lejuar që të dënuarit për këto raste të kastrohen kimikisht.
Kastrimi kimik do të thotë një lloj i trajtimit përmes injektimit apo barnave të cilat do të ulnin dëshirën për aktivitete seksuale, pra do të ulin nivelet e testosteronit te burrat, si hormonin që shkakton shtytjen drejt aktiviteteve seksuale.
Ndërsa në lajmin lartë flitet për një procedurë shumë më të vështirë dhe më invazive, siç është tredhja kirurgjikale.
Ligjvënësit në Maqedoninë e V. megjithatë vitin e kaluar vendosën që të heqin edhe mundësinë e kastrimit kimik për të dënuarit për këto vepra, ndër arsyet për këtë ishte pasi ky sanksion përkundër që ka ekzistuar, asnjëherë nuk ishte vendosur në praktikë – pra, asnjë të dënuari nuk i është shqiptuar ky dënim.
Përpos kësaj, rikujtojmë që ministria e drejtësisë vendosi që të ulë dënimet me burg për personat që abuzojnë seksualisht me fëmijë nën moshë 14 vjeçe, edhe atë për 50 për qind. Nëse më herët këta persona janë dënuar deri në 12 vite burg, tashmë do të dënohen me të paktën 8 vite burg.
Për dallim nga ShBA-të, të cilët fëmijlë i konsiderojnë personat deri në moshën 13 vjeçe, nën kategorinë ‘fëmijë’ sipas legjislacioni të Maqedonisë së V. hyjnë të gjithë personat deri në moshën 15 vjeçe.
“Studimet e ndryshme rreth përdorimit të këtij tretmani flasin për uljen e normës së recidivizmit te kjo vepër penale në shtetet në të cilat aplikohet.” kishte thënë për ‘Mollëkuqja’ profesoresha e të drejtës penale, Vedije Ratkoceri.
Në Maqedoninë e Veriut ka zyrtarisht 319 pedofilë, emrat, mbiemrat, pseudonimet dhe të dhëna tjera për këta persona mund t’i gjejmë në www.registarnapedofili.mk. Numri i pedofilëve besohet të jetë shumë më i lartë, pasi jo të gjithë janë të evidentuar në këtë regjistër.
- Përktheu nga The Guardian dhe plotësoi me kontekstin e Maqedonisë së Veriut: Ardit Ramadani.
- Më shumë në lidhje me këtë, lexoni duke klikuar KËTU.
