Vjollcë Berisha në "Llafe Grash": Nuk kam pasur pengesa që të mos jem në një pozicion vetëm sepse jam grua

Vjollcë Berisha, Zëvendës Ministre e Bujqësisë, Pylltarisë dhe Ekonomisë së Ujërave e ftuar në emisionin "Llafe grash" theksoi se nuk ka pasur pengesa që të mos jetë në një pozicion vetëm sepse është grua.

"Unë kam qenë edhe Sekretare Gjenerale e partisë, që është pozicioni i dytë në parti, vazhdoj të jem kryetare e Asamblesë së Gruas, prapë brenda partisë politike. Nuk kam pasur pengesa që të mos jem në një pozicion vetëm sepse jam grua", thekson Berisha.

Sipas saj, ndoshta individualisht nuk janë të gjitha partitë aq të hapura (për t'i mirëpritur gratë nëpër parti), por deklarativisht, duke thënë që po edhe ato (gratë) duhet të jenë pjesë të partive, për partinë ku është vetë Berisha, Aleanca e Shqiptarëve, ajo mendon se e ka tejkaluar tashmë këtë.

Sipas saj këtë e dëshmon fakti që Berishës ju dha pozita e njeriut të dytë në parti, fakti që sot partia ka dy nga katër nënkryetare gra, dhe sipas saj ato nuk janë zgjedhur sa për t'i vënë dy gra, por mendojnë që nuk ka një burrë tjetër që mund t'i zëvendësojë në këtë moment.

"Shumë natyrshëm, pa e parë gjininë, dolën në fund dy me dy", thekson ajo.

Sa i përket të qenurit pjesë e jetës publike, Berisha pranon që gjithmonë do të jetë palë që të përkrahin dhe palë që nuk janë në anën tënde.

"Mendoj që duhet të jemi shumë koshient që je një dritë që dukesh dhe të tjerët të shohin. Domethënë, ti nuk fshihesh dot dhe ata që të shohin edhe të pështyjnë edhe të puthin. Ne duhet të pajtohemi me të dyja për sa kohë kemi marrë në supe të bëjmë diçka për shoqërinë, dhe unë mendoj se për këtë nuk e kam vrarë kurrë mendjen. Mendjen e vras gjithnjë që lufta brenda subjektit politik të jetë e drejtë, dhe aty nuk kam vërejtje", thekson ajo.

LEXO EDHE KËTË: Vjollcë Berisha në "Llafe Grash": Burrat pozitën e grave në shoqëri e barazojnë vetëm me riprodhimin