Dhjetëra mijëra gra që kanë kaluar nëpër menopauzë mund të përfitojnë nga një ilaç i ri për forcimin e kockave, thotë Instituti Kombëtar për Përsosmërinë e Shëndetit dhe Kujdesit (NICE).
- Burimi: BBC
- Përktheu dhe përshtati: Fisnik Xhelili
Abaloparatidi mund të mbrojë kundër gjendjes së hollimit të kockave të quajtur osteoporoza, e cila shkakton rrezik të lartë të thyerjes së kockave në moshat e vjetra.
Ai do të bëhet i disponueshëm ë Angli brenda tre muajve të ardhshëm, thotë NICE.
Injeksioni, i cili vjen si një stilolaps i mbushur paraprakisht që njerëzit mund ta administrojnë vetë në shtëpi një herë në ditë, inkurajon qelizat të bëjnë kockë të re.
Trajtime të tjera të osteoporozës janë tashmë të disponueshme, por kjo është një alternativë e re për njerëzit që nuk i janë përgjigjur ose që nuk mund t’i tolerojnë ato.
Alison Smith, e cila u diagnostikua me osteoporozë në vitin 2011, tha për BBC se trajtimi i ri do të bënte një “ndryshim të madh” për shumë pacientë që “ngurrojnë” të marrin ilaçe aktualisht të disponueshme “për shkak të efekteve anësore”.
Ilaçi i ri është “një trajtim shumë i toleruar” për shumicën e njerëzve, sipas mjekut Nicky Peel, administrator klinik në Shoqërinë Mbretërore të Osteoporozës dhe mjek metabolik i kockave me bazë në Sheffield.
Dr Peel tha se ndërsa disa njerëz përjetojnë nauze, dhimbje koke dhe palpitacione – shpesh gjatë fazave të hershme të trajtimit – Abaloparatide është i përshtatshëm për shumicën e njerëzve me rrezik të lartë të frakturës së kockave.
Megjithatë, paralajmëroi se “sfida” është të sigurohet që pacientët të kenë qasje në “shërbimet e duhua diagnostikuese” që do të identifikonin nevojën e tyre për ilaçin.
Njerëzve do t’u ofrohet trajtim me ilaçe nëse mjekët mendojnë se janë në rrezik mjaft të lartë për të thyer kocka.
Theramex, e cila prodhon ilaçin, ka rënë dakord për një çmim të pazbuluar me NHS.
Në kohën kur njerëzit janë në mesin e të 20-ave, forca e kockave do të ketë arritur kulmin.
Që atëherë, ajo natyrshëm bie.
Megjithatë, nëse humbja e kockave është e rëndë, ato mund të thyhen lehtësisht edhe pas një përplasjeje ose rënieje të vogël.
Marrja e mjaftueshme e vitaminës D dhe kalciumit është gjithashtu e rëndësishme për shëndetin e kockave. Terapia e zëvendësimit të hormoneve (HRT) rreth kohës së menopauzës mund të ndihmojë gjithashtu
Gratë janë më të rrezikuara nga zhvillimi i osteoporozës sesa burrat për shkak të ndryshimeve hormonale që ndodhin me menopauzën.
Nivelet e estrogjenit bien, gjë që mund të dobësojë kockat.
Profesori Jonathan Benger, shefi mjekësor dhe zëvendës shefi ekzekutiv në NICE, tha: Komiteti i pavarur dëgjoi nga pacientët se sa dobësuese mund të jetë osteoporoza.
“Fokusi ynë është në mundësimin e aksesit në kujdes që përmirëson cilësinë e jetës duke ofruar vlerë për tatimpaguesit.”
Më shumë se tre milionë njerëz kanë osteoporozë në Mbretërinë e Bashkuar.
Prevalenca rritet ndjeshëm me moshën – rreth 2% e grave të moshës 50 vjeç e kanë atë në krahasim me pothuajse gjysmën e grave që janë 80 vjeç, thotë NICE.
Më shumë se një në tre gra dhe një në pesë burra do të kenë një ose më shumë fraktura osteoporotike gjatë jetës së tyre.
