Kur rolet gjinore kalojnë pragun e shtëpisë, burrave u pamundësohet ndërrimi i fëmijëve në tualete publike

Në shumicën e tualeteve publike që ka vizituar Mollëkuqja, shtretër për pastrimin dhe ndërrimin e fëmijëve ka vetëm në toaletet e grave. Kjo përforcon rolet gjinore në të cilat, gratë pritet të kujdesen për fëmijët, kurse burrat janë të dekurajuar për ta bërë këtë.

Edhe pse në qendrat tregtare “East Gate” dhe “Ramstore” ka hapësira të veçanta të dedikuara për kujdesin e foshnjeve, megjithatë në simbolin tregues për këto hapësira shfaqet vetëm një grua me një foshnjë. E njëjta situatë nuk vlen për “Skoje City Mall”, pasi që në simbolin tregues për hapësirën e veçantë të dedikuar për kujdesin e foshnjave dhe fëmijëve shfaqen: një burrë, një grua dhe një fëmijë.

FOTO E REALIZUAR NË “RAMSTORE MALL” NGA MOLLËKUQJA.

FOTO E BËRË NË EAST GATE NGA MOLLËKUQJA.

FOTO E REALIZUAR NË “SKOPJE CITY MALL” NGA MOLLËKUQJA.

Ky fenomen nuk është i dëmshëm vetëm për gratë, por sipas asaj që na tha një baba i ri, Asdren Çeliku, edhe meshkujt hasin në vështirësi kur janë në vende publike së bashku me fëmijët e tyre. Si baba, ai ndau përvojën e tij dhe tha se deri më tani nuk i ka rastis që në toaletet e meshkujve të ketë shtretër për ndërrimi e foshnjeve dhe se kjo situatë e ka detyruar që të kërkojë alternativa tjera për t'u kujdesur për foshnjën. Ai gjithashtu shprehet se është më se e nevojshme që shtretërit për ndërrim të foshnjeve të jenë prezent edhe në toaletet e meshkujve.

Jam detyruar të gjej zgjidhje të tjera jo shumë të lehta, si për shembull jam detyruar të ndërroj fëmijën/foshnjën në makinë. E shikoj si diçka jo shumë të logjikshme, jopraktike që u sjell vështirësi meshkujve për t'i kryer nevojat e foshnjës

tha ai.

Këtë e diskutuam me sociologun Latif Mustafa, i cili tha se në shoqërinë tonë roli i gruas është të fshijë, të kujdeset për familjen, të gatuajë dhe roli i burrit është të sjellë para në shtëpi. Pra, roli i gruas shihet kryekput si përkujdesëse e fëmijëve, rrjedhimishit, edhe ndërruese e pelenave apo pampersave. Por që në fakt kjo punë, si çdo punë tjetër u përket edhe burrave. Mustafa gjithashtu ndau me ne situatën në vende të tjera pos Maqedonisë së Veriut.

Në shumë shtete të tjera, aeroporte dhe hapësira të ngjashme, hapsirat për akomodimin dhe ndërrimin e fëmijeve janë neutrale dhe pa ndonjë shenjë gjinie, që i bie se këtë ndërrim mund ta bëjë dhe duhet ta bëjë secili, pavarësisht orientimit gjinor”, tha Mustafa. “Nuk ka asgjë të keqe që një grua ta bëjë këtë, por në këto hapësira, restorante dhe ambiente të tjera, vetëm femrat janë të shënuara si ndërruese të pelenave

tha Latif Mustafa.

Brenda shtëpisë, Mustafa thotë se puna ndahet mes partnerëve në bazë të preferencave personale dhe jo në bazë të patriarkatit.

"Sot në shtëpitë tona, ka shumë burra që ndërrojnë të palarat e fëmijëve dhe bëjnë punët," tha ai. “Angazhimet janë të ndara bazuar në preferencën e kohës dhe hapësirës ku jetojnë dhe jo rolin që u është caktuar nga sistemi patriarkal.”

Komisioni për Ndalimin dhe Mbrojtjen nga Diskriminimi i Maqedonisë së Veriut tha se deri më tani nuk kanë pranuar asnjë ankesë nga qytetarët në lidhje me pamundësinë e burrave për t'u kujdesur për foshnjat e tyre në hapësirat publike, respektivisht toaletet publike. Komisioni gjithashtu tha se për shkak të mungesës së një procedure konkrete për këtë temë, nuk mund të përcaktohet nëse ka apo jo diskriminim gjinor në situatën e tualeteve publike.