Nesër në Shkup do të mbahet Parada e Krenarisë, e pesta me radhë

Nën sloganin "Mosbindje Spektakolare" nesër, më 22 qershor (e shtunë) në Shkup do të mbahet Parada e pestë e Krenarisë.

Parada do të fillojë me mbledhjen e pjesëmarrësve nga ora 17:00 në parkun “Gruaja-luftëtare” (përballë Kuvendit të Republikës së Maqedonisë së Veriut).

Në orën 19:00, pas fjalimeve të shkurtra, do të ketë marshim nëpër rrugët e Shkupit i shoqëruar me muzikë.

Rrjeti Kombëtar Kundër Homofobisë dhe Transfobisë përmes një konference për shtyp kushtuar edicionit të sivjetmë të Paradës së Krenarisë njoftoi më tepër detaje në lidhje me organizimin.

“Nëse kontestohet ideja jonë për barazi, dinjitet dhe të drejtën e mirëfilltë për jetë, atëherë PO, ne zgjedhim të jemi të mosbindur”, tha Angell Dimitrievski, drejtor ekzekutiv i Asociacionit për Zhvillim të Edukimit Ekvalis.

“Presim që edhe këtë vit të ofrohet i njëjti nivel sigurie si në vitet e kaluara”, tha Urania Pirovska, drejtoreshë ekzekutive e Komitetit të Helsinkit për të Drejtat e Njeriut.

"Do të jetë një nga ngjarjet më të mira dhe më të vizituara në Shkup, si vitet e kaluara”, tha Koço Andonovski, drejtor programi në Qendrën LGBTI për Mbështetje.

Organizatorët kanë njoftuar se Parada do ofrojë një program të pasur kulturor dhe argëtues, me performanca muzikore live, performanca nga drag queens nga vendi dhe rajoni si dhe DJ.

Programi në stadiumin e ARM-së në Parkun e qytetit do të fillojë në ora 20:30 dhe do të zgjasë deri në orën 01:00.

"Mollëkuqja" mbështet paradën e krenarisë dhe ju bën thirrje të gjithve që të merrni pjesë.