Qendra për Mundësi të Barabarta “Mollëkuqja” dhe Klinika Juridike “Emine Zendeli” kanë filluar ofrimin e ndihmës juridike primare falas për viktimat e dhunës me bazë gjinore dhe dhunës seksuale në rajonin e Pollogut.
Ky shërbim ju takon grave të Komunës së Tetovës, Gostivarit, Bogovinës, Tearcës dhe Zhelinës. Shërbimet ofrohen nga juristë kompetent dhe të trajnuar për ofrimin e këtij shërbimi dhe të njëjtat përfshijnë:
- Informacione për paraqitje të dhunës
- Shoqërim për raportim të rastit në Qendrën për Punë Sociale
- Shoqërim për raportim të rastit në polici
- Përgatitje dhe parashtrim të akteve juridike (ankesa, kërkesa…)
Për të kërkuar ndihmë gratë duhet të plotësojnë formularin dhe do të kontaktohen nga ekipi përgjegjës. Të njëjtat duhet të kenë kujdes në shkrimin e të dhënave dhe numrit të telefonit, meqë nëpërmjet të njëjtit do të kontaktohen.
“Ne në Klinikën Juridike japim informata se si mund të zgjidhet rasti, japim informata se çfarë rrjedhe e procedurave mund të ndiqet që qytetari të mund ta realizojë një të drejtë të tij, dhe burimin se ku të kërkojë ndihmë. Ne ju ndihmojmë të plotësojnë formularët e nevojshëm për shkresa të ndryshme”, thekson profesoresha universitare Arta Mero nga Klinika Juridike “Emine Zendeli.
Synimi i “Mollëkuqja” është që viktimave të dhunës në familje, dhunës me bazë gjinore dhe dhunës seksuale të ju japë qasje në ndihmë primare juridike dhe mbështetje ligjore në mënyrë që të njëjtat të kenë informacionet e duhura por edhe mbështetjen e duhur për të ndërmarrë hapa për t’i thënë jo dhunës.
“Ne po tentojmë të ua bëjmë më të lehtë viktimate të dhunës me bazë gjinore dhe dhunës seksuale qasjen deri në institucione. Institucionet tona shumë shpesh nuk kanë informacionet e nevojshme se si duhen trajtuar viktimat dhe çfarë ju takon atyre sipas ligjeve. Nëpërmjet shërbimeve tona ne po tentojmë të plotësojmë këtë hendek”, deklaroi Rita Behadini nga organizata “Mollëkuqja”.
Të gjitha shërbimet e ofruara ndaj viktimave janë pa pagesë me qëllim lehtësimin e procedurave juridike.
