Pesë ditë me radhë (16-20 tetor) gratë të cilat po përjetojnë shenjat e para të menopauzës si dhe gratë në menopauzë do të mund të kryejnë kontrolle dhe konsulta pa pagesë në Klinikën për Gjinekologji dhe Akusheri në Shkup. Mollëkuqja mëson se për këto kontrolle nuk është i nevojshëm caktimi i terminit paraprak e as udhëzimi nga mjeku amë.
Aksioni po ndërmerret për nder të 18 tetorit, që është dita botërore e menopauzës. Kontrollet dhe konsultat do të realizohen nga data 16 tetor deri më 20 tetor, nga ora 14 deri në 20, në ambulancën me numër 11.
Daniel Milkovski, Aneta Suma, Dimitar Kalçovski, Natasha Ilieva dhe Iva Malahoa Gjoreska do të jenë mjekët që do t’i kryejnë këto kontrolle dhe konsulta, secili prej tyre do të jetë përgjegjës në ambulancën me numër 11, në data të ndryshme.
Mollëkuqja më herët ka shkruar për menopauzën dhe efektet që ka kjo periudhë për gratë diku mes moshës 45 dhe 55 vjepe.
- Lexo edhe këtë: 65 për qind e grave nuk janë të pregatitura për menopauzë, ju nevojitet mbështetje në atë periudhë stresuese, thonë gjinekologët
Një përqindje e lartë e grave, deri në 65 për qind, thonë se janë të papërgatitura për menopauzë, një periudhë e natyrshme e plakjes që shoqërohet me rënie natyrale të hormoneve riprodhuese të një gruaje që fillon diku mes moshës 45 dhe 55 vjeçe. Ndaj, siç këshillojnë gjinekologët, ndjeshmëria dhe kujdesi individual është i nevojshëm për çdo grua që e kalon këtë fazë krejtësisht natyrale, por ndonjëherë edhe stresuese të jetës. Menopauza nganjëherë quhet “ndryshimi i jetës” dhe sinjalizon fundin e aftësisë së një gruaje për të pasur fëmijë.
Disa faktorë rreziku që mund të ndikojnë negativisht në shëndetin kognitiv te gratë në menopauzë (periudha që i paraprin menopauzës), janë: obeziteti, presioni i lartë i gjakut i parregulluar, diabeti, pirja e duhanit, pasiviteti fizik, reduktimi i ndërveprimit social, pasiviteti kognitiv, ankthi dhe depresioni.
